مناجات با خدا-شاعر:غفاري اردبيلي
اي نگار بزم وحدت ديده گريان گلميشم
ماه غفراندور گناهيمدن پشيمان گلميشم
چوخ چتين گونلر گئچوب سنسيز بويورقون بندووه
پشت سرده قويموشام وحشتلي طوفان گلميشم
سن ويرن پاكيزه روحي ئولدوروب دفن ائتميشم
دست خالي،ورشكسته،غرق عصيان گلميشم
گورموشم ئوز چهره مي آئينه عرفانيده
قورخموشام وحشتلي چهره مدن هراسان گلميشم
يا رجائ الخائفين من ئوز اليمدن قاچميشام
سينديروبدور نور قرآن قفل زندان گلميشم
حرمت مهمان يواجب ايليوبسن سن ئوزون
الده دعوت نامه بزم عشقه مهمان گلميشم
قاني قانيلن يومازلار عفو ايله اغماض ائله
فكر ائله نادانليقمدان ايليوب قان گلميشم
بيلميشم رحماني روحوندن وئروبسن پاي منه
وئرمگه اهريمني رفتاره پايان گلميشم
خالصانه،عاشقانه،بي ريا،ثابت قدم
چكميشم روح نفاقه خط بطلان گلميشم
ئوللم اما ويرمرم الدن سنون دامانوي
محضر جانانيمه الده دوتوب جان گلميشم
وئر سروسامان پريشان قلبيمي آباد ائله
منزل معمار عشقه نابسامان گلميشم
شكر اولا اايتميشديم اما عاقبت تاپديم يولي
جذبه عشقون چكوب افتان وخيزان گلميشم
گلميشم شايد غلط سوزدور ئوزون گتدون مني
نابجادور محضرونده اولسا عنوان گلميشم
چونكه سن غفارسن لطف ايلدون غفاريه
شوقدن درگاه حقه اشك ريزان گلميشم