نوحه های عاشورایی-بخش دوم
احوالات حضرت علی‌اصغر
او دم کی حرمله ننگین اله تیر و کمان آلدی
ملک‌لر ضجه چکدی شیعه‌لر خط امان آلدی
خبـر وئـر هر مریضه ناامید اولسا معالجدن
بو طفله آغلاسون تا بهره‌مند اولسون نتایج‌دن
علاجون ایسته‌سون بوسودامر باب‌الحوائج‌دن
کیمه ائتدی طبابت مزدینه اشک روان آلدی
حقیقت گورسنـر قلب سلیم و چشم بینایه
ازلدن حرمله کور اولدی ساتدی دینی دنیایه
خریـدار بهشته بیـر اووج قان الده سرمایه
حسینون سودامر سربازی جان وئردی جنان آلدی
دیزین برکیتدی یئرده اوخ آتان بیر پهلوان مثلی
کمان پرتاب و زه تابیده اوخ برق جهان مثلی
هدف بیر آلتی آیلیق سودامر برگ خزان مثلی
حسینون خیری اولسون غنچه وئردی گلستان آلدی
گؤر اوچ پر اوخ سودان آیـری دوشن بیرماهیه نیلر
دگــه دیــوار مسجــدده قانادسیز یاهویا نیلر
ابوالفضلی ییخان بیراوخ گؤرون شش ماهیه نیلر
باش آیریلدی بدندن قلب زهرادن توان آلدی
اوخی چکدی بـوغازیندن آتوب قان مثل فواره
دمادم دولدوروب اؤوجین ائدوب عرضه خریداره
جنــازه اللــری اوستـه قالوب میداندا آواره
ندای احسن احسن ذات حقدن ناگهان آلدی
آتانون اللری قان، یوز گؤزی قان، آغ محاسن قان
بالانون ایسلادوب آغ دوشلوگین زیبا لباسین قان
اولوب باب الحوائج ایلدی تضمین بقاسین قان
عموسی حضرت عباس تک نام و نشان آلدی
نظر اطرافینه سالدی اوزین تک گوردی میداندا
دئدی قارداشلاریم اوغلوم خدا غرق اولموش آلقاندا
قالان بیــر سودامـر سربازیمیـدی ذیل پیماندا
اودا صدساله درسی آلتی آیدا بی‌زبان آلدی
بو غمدن پارچالانمیشدی نه طاقتده داغ اولسیدی
بهارون فصلی سولمیشدی نجه عالی باغ اولسیدی
بالام ال اوسته قالمازدی ابوالفضلیم ساغ اولسیدی
گوروب قارداش‌سیزام اطرافیمی بو قوم کوفیان آلدی
اؤزون محشر گونی ای منتقم قیل عدلیلن دیوان
بو مـن او حرمله بو اصغر مظلوم او ناحق قان
ساتان من مشتری سن قان متاعیم قیمتی رضوان
اوزون وئر خیرینی یارب ساتان ساتدی آلان آلدی
بالا از بسکه چیرپیندی آتانون سینه‌سی اوسته
وئروب جان مرغ بسمل تک ولیکن قول قاناد بسته
قویوب یوز خیمیه ساری آتا خسته بالا خسته
اوزاقـدان رمـزی اوّل زینب بی‌خانمــان آلدی
ئوره‌کلندی دئدی قارداش گل خندانوه قربان
سووا عطشان گئدوب عطشان گلن مهمانوه قربان
الـون اوستـه ملک‌لـر آغلیـان قربانووه قربان
بودیلسیز نیلمیشدی دشمن آخر قانه قان آلدی
دئدی سن اولماسیدون خیمیه باجی گلنمزدیم
آناسـی خیمه‌دن باخسیدی من تَلّی اننمزدیم
بو حالیله کی سن گوردون گؤزونه گورسننمزدیم
ربابه درسی سن وئردون فلک سخت امتحان آلدی
وداعین وقتی دور باجی فراقه قوی ائدوم تمکین
عیـادت ایلیـوم سجادیدن دردی تاپا تمکین
مریضـون یاننه گئتمکده اما وارگوزه‌ل آئین
گوررسن هـر کسی بیر هدیه در حد توان آلدی
مریضه دسته‌گل باغلالا بیرخوش رسم و عادتدی
اودور سجـاده گتـدیم بـو گلی وقت عیادتدی
آپار وئر ایلسون وئرسون سیزه بو یاخشی فرصتدی
مریض ایلر گلی اوندان گوررسن دیگران آلدی
وئرنــده هــر قیــزا امــا دئنن آرام آل آغوشه
یواش باس باغریوا دیسگینمسین الان گئدوب هوشه
آتـوب دوتما بوغازیندن دوباره قان گلر جوشه
وئـرون الــدن الـه بلکـه ربـاب مهـربان آلدی
آلوبلا قانلـی قنداقـی اؤپـن الـدن اله وئردی
بوغازینون یاراسین کیم گوروب زلفین یئله وئردی
ربابـه نوبـه چاتدی شاعیره مولا صله وئردی
سیزیلتیلان ایله نوحه دئدی فیض کلان آلدی
دئدی گر چه غموندن اؤلمدیم من زنده‌یم اوغلوم
نقدری کی آدون اوستومده وار پاینده‌یم اوغلوم
قصوریم اولدی سندن حشره‌جک شرمنده‌یم اوغلوم
منیم سینم‌ده‌سن بخت اولدوزیدون آسمان آلدی
یقینیمدور گجه چوخ اینجیمیشدون ایندی دینجلدون
یانوردون صبحه‌جک آهون اُوخیله قلبیمی دلدون
ائوون آباد کوسموشدون گینه آغوشیمه گلدون
کأنـّـه آلتــی آیلیــق دستمزدیـن باغبان آلدی
شاعر: منزوی
اوضاع کربلا
کربلاده کوفیان آیا نه عنوان قویدولار
خاندان مصطفی‌نی خانه ویران قویدولار
بوقراری قویمیوب یوخسا خداوند حیات
مهر زهرادور همان بوقان اولان آب فرات
بو کلامـه نامسلمانلار گوتوردی نه ثواب
صاحب آب فراتی اوچ‌گون عطشان قویدولار
حق طریقیندن چیخوب پیغمبر اوغلون داندیلار
جیفــۀ دنیایــه دونــان زمــان تولاندیلار
تؤکدولر مظلومه قانین اوچ گون عریان قویدولار
خون‌بها هر بیر شهیده، بی‌بها قان قویدولار
گل مجـاهد سیرینـه قـوی عرصۀ عشقه قدم
حضرت عباسی گور مشک اوخلانوب قوللار قلم
سعـی جنگ ایلـر مبادا سرنگون اولسون علم
هر طرفدن اوستونه یوز قوم عدوان قویدولار
گوردولـر شهبـاز اوج همتـی بی‌بال دور
کاسـه چشمـی دولوب قانیله مالامال دور
اقتداری جنگه یوخ چوخ‌چوخ پریشان‌حال دور
بی مروتلر بنای تیرباران قویدولار
گوردولـر اکبـرده ظاهـر دور شعاع نورحق
کربلا صحراسینی اول نورائدوبدور طورحق
حضرت موسا کیمی دوتموش وجودین شورحق
شیوۀ فرعونیانی آل سفیان قویدولار
موجه گلدی شامیان پرموج دریالر کیمی
فرق پاکی اولدی منشقّ تیغیله حیدر کیمی
ام لیلانـی ســر زلـف علـی‌اکبر کیمی
ایلیوب آشفته عمرینجه پریشان قویدولار
اکبرین اون سگّیز ایل چکمیشدی لیلا زحمتین
بولمورم یارب نئجه گوردی اونون او حالتین
سالدیلار توپراقلار اوسته سروه بنزر قامتین
گون قباقینده یارالی نعشین عریان قویدولار
آلـدی آغوشـه علـی‌اصغری سلطـان دیـن
گئتدی میدانه بویوردی رحم ائدون ای قوم کین
چون حسینـی گوردولر بو حالتیله مشرکین
چکدیلـر ناله بنـای آه و افغان قویدولار
باغ زهرایه تاپوب یول یوز قویوب زاغ و زغن
گل سولوب بلبل اولوب یاسه باتوبدور یاسمن
گل سولوب بلبل‌لر آغلار اولدی غمخانه چمن
نه چمن نه گل نه بلبل نه گلستان قویدولار
ظهـر عاشـورا حسینـی شمـر دون بـی‌حیا
سینه‌سی اوسته چیخوب ائتسون ذبیحاً من قفا
عـرش حقـدن دمبدم فرشه گلوردی بو ندا
قویمیون کافر‌لری اسلامی ویران قویدولار
خیمه‌ده زینب اوتورموشدی ائدردی شور و شین
گوردی آفاقی دوتوب دور نالۀ «قُتِلَ الحسین»
گلدی میدانه چکوب ناله توکردی اشک عین
عرض ائدردی دور منی سنسیز حسین جان قویدولار
شاعر:خازن
روز عاشورا
یوم عاشورا دی یا روز قیامت دیر بوگون
یا قیامت عرصه‌سیندن بیر علامت دیر بوگون
عالـم باطنده ایمـدی کربلا قان آغلیور
خنجر قاتل باخیر مقتوله هر آن آغلیور
بیـر طرفـده لیلـی‌زار و پریشان آغلیور
بیر طرفده زینبه گویا قیامت دیر بوگون
گه گلـور تل اوسته اول نالان باشیندا اللری
گه ییغیرباش‌سیزلاری باشه تؤکور یاش گوزلری
گه گیدور گاهی دورار از بسکه تترر دیزلری
آخر اول بیچاره ده گور بیرنه حالتدور بوگون
هر طرفدن ایمدی دشمنلر آلوب دور و بری
قانـه غلطـان ایلیوبلـر شــاهزاده اکبـری
تیغ و خنجرله اولوبدور پاره‌پاره پیکـری
ام لیلی گور نئجه صاحب سعادت دور بوگون
ووردیلار از بس بوگون بیحد جراحت قاسمه
زخم خنجر حاصل ائتدی استراحت قاسمه
قوردی شـاه کربلا اسباب عشرت قاسمه
قان حنا یاخدی او عشرتدن اشارت دور بوگون
کربلا دشتی دولوب بوگون فغان و دادیله
دولدوروب صحرانی زینب ناله و فریادیله
سالدیـلار عبـاسی آتدان قامت شمشادیله
نه باشی سالم نه قوللاری سلامت دور بوگون
بیر طرفده شمر دورموش خنجر برانیله
بیر طرفـده سـرور دوران لب عطشانیله
نقد جان الده دوتوب سودا ائده جانانیله
چون گورردی یاخشی بازار تجارت دور بوگون
حرملـه بیـر یانـدا الـده نـاوک پیکان دوتوب
متصل قان قان دیور چون گوزلرینی قان دوتوب
اصغری ایلوب نشان اصغر الینده جان دوتوب
کربلاده گور بو ساعت بیر نه ساعت دور بوگون
نه شه لب تشنه‌دن قوم ستمگـر ال چکر
نه شـرار دل نـه اشگ دیـدۀ تر ال چکر
نه قویور گئتسون او بی‌کسدن حرملر ال چکر
نه خیال یاردن بیر لحظه راحت دور بوگون
سالدیلار پیغمبر اوغلون ذوالجناح اوستن یئره
قاره یئللر اسـدی عالم دگدی یکسر بیربیره
قطب دین اطرافین آلدی قوم کین چون دایره
روزگار دون بو دوروندن خجالت دور بوگون
اولدوروب اول سروری طبل بشارت چالدیلار
حضـرت زهرانـون الـدن اختیـارون آلدیلار
قرخه دین عورت اوشاق السیز ایاق‌سیز قالدیلار
شاه دین قتله یئتوب روز شهادت دور بوگون
ظلم ایله اؤلدوردولر بوگون مدینه شاهنی
اهل‌بیتین سویدیلار یاندیردیلار خرگاهنی
باغلادیـلار ظلم الیله اول شهون درگاهنی
ووردیلار باشین جدایه قتل و غارت دور بوگون
شاعر:صافی
احوالات شب عاشورا
بو گئجه بیعت پوزولدی آشنالر گئتدیلر
قویدولار پیغمبر اوغلون بی‌وفالر گئتدیلر
منبر اوستونده حسین بن علی صاحب وقار
شوریلـه منشـور عـاشورانی ائتـدی آشکار
روشن اولدی صبح آچیلسا قتل وار کشتاروار
عشـق دنیـای فنایـه مبتـلالر گئتـدیلر
شبپـره مثلـی تمتـع گوردیلر ظلماتیدن
خیر محضی نفی ائدوب ال‌چکدیلر اثباتدن
کعبـۀ آمــالیده آیریلدیـلار میقــات‌دن
گیمه‌میش احرامنی حاجی نمالر گئتدیلر
بولدیلر یوخدور حسینه یوم عاشورا ظفر
بوی مرگی درک ائدوب سسلندیلر این المفر
مین نفر حضاردن قالدی فقط یئتمیش نفر
قالـب غیرتلـری بـی‌محتوالـر گئتـدیلر
نقل ائدور شخصاً سکینه شاه دینون دختری
قیلدی فرمایش بابام سوندوردیلر مشعل‌لری
آز زماندا خالـی اولدی خیمه‌لر دور و بری
بش‌بش اون‌اون اهل تزویر و ریالر گئتدیلر
صبح آچیلدی الغرض وئردی قالانلار امتحان
کهنه عاشق‌لر تاپوبلار عشق حقدن تازه جان
لبلـری گل مثلی خندان و ئوره‌کلر شادمان
کوی جانانـه سلیــم‌المدعالـر گئتدیلر
نه مهاجردن قالوب بیر کیمسه نه انصاردن
بیربه‌بیـر دلبرلـر آیریلدی گوزه‌ل دلداردن
عشق و سرمستی گئچوب اندازه‌دن معیاردن
کیمیاگر قالدی حیران، کیمیالر گئتدیلر
آلدی رخصت ائتدی اکبر فی سبیل‌الله جهاد
یاره‌لندی زینـدن دوشدی یئره اول پاکزاد
قرمزی ژاله ایلـه آغ‌گل ائتدی گویا اتحاد
حالـدن یکسر مقیمـان سمالر گئتدیلر
فی المثل خاک بلایه پاره‌لنمیش آی دوشوب
عالم غیب و شهوده قورخلی بیر های دوشوب
گوش جناتـه صدای ناله و ایوای دوشوب
بارگاه قـدس اعلایه صـدالر گئتدیلر
جـان بلب مظلـوم امامـه ایلدی اکبر سلام
اوغلونون آلدی سلامین سسلنوب گلدیم بالام
خیمه‌دن چیخدی حسین ائتدی جوانلار ازدحام
قتلگاهـه سـاری اهل ابتـلالر گئتدیلر
چاتـدی میدانـه حسیـن دیلده علی‌‌اکبر آدی
جان دئدی، اوغلوم سنی هانسی قلجدی دوغرادی
نـوح تک عمر ایلسم اولمازمنه سنسیز دادی
گوزلریمده ییر وقتیمده ضیالر گئتدیلر
باشـون اوستـه یـاوران طیب انفاسیم گلور
گوزلرینـده گوزیاشـی دیداره عباسیم گلور
یولداشون هم مسلکون هم صحبتون قاسم گلور
گل دیلـه یارا و طاقتدن فتالر گئتدیلر
چوخدی سؤز کئچدوم مفصل‌دن بو یئرده مجمله
اوغلونون اعضاسینی گوردی حسین گلمز اله
حملینی مشکل بولـوب سالدی عباسین مقتله
وئردی بیر فرمان گؤیه یئردن نوالر گئتدیلر
ای جوانلار حمل ائدون قارداشوزی میدانیدن
دردمندم چاره‌سیز ال اوزمـوشم درمانیدن
گوز تیکن چوخدور یولا نسواندن طفلانیدن
خیمه‌لرده اوزلریندن بی‌نوالر گئتدیلر
حامل اولدی آل هاشم پرپر اولموش لالیه
باغبانون اشکی گل هجرینده دوندی ژالیه
تلــدن اندیردیلــر گلـدی حرملـر نـالیه
قاره باشدا یاسینه بختی قرالر گئتدیلر
آچدیلار قانلی عبانی سس دوشوب داغداشلارا
باخدیلا الوان اولان مژگانلارا گوز قاشلارا
گوردیلر باشدا یاراسین گئتدی اللر باشلارا
تاب و طاقتدن بالالار هم آنالار گئتدیلر
شاعر: انور
شب عاشورا
بوگجه آخر عمروم شب هجراندی باجی
من سنه اوغلوم علی لیلیه مهماندی باجی
ایلسـون زیـب کنـار اکبری لیلا بوگجه
یاتماسون صبحه تک اول بلبل شیدا بوگجه
ایلسون اوز گلنه یاخشـی تماشا بوگجه
صبح آچیلسا گوره جاقدی گلی خنداندی باجی
ام لیلــی ایلسـون زینـت علــی‌اکبرینه
سرمه چکسون بالامون آهوباخیش گوزلرینه
شانه ویرسون او ملک منظریمون تللرینه
گرچه زینت‌سیز اؤزی بیر مه تاباندی باجی
اصغریمـده ره جانانیده جاندان گئچه‌جاق
اللریم اوسته بالام سو یئرینه قان ایچه‌جاق
بوغازین خنجر بران کیمی پیکان بیچه‌جاق
شیرخوارم بو مناده قوزی قورباندی باجی
گـوزوم عبـاسه باخور قلبیدن آرتور المیم
وئره‌جاق باش قالاجاق باش‌آچوق اهل حرمیم
سیناجاقدور قوشونوم هم یاتاجاقدور علمیم
شاخه‌سیز سرو قدی زینت میداندی باجی
من کسیک باشیله ترویج ائدرم قرآنی
ییخــارام کـاخ جفـا و ستـم عدوانی
بیرگیجه دیره گتورم باش‌آچوخ عیسانی
هر یئره گئتسه باشیم دینه نگهباندی باجی
قلبیمی زهرلی اوچ شعبه‌لی پیکان دله‌جاق
ییخلوب تپراقا یورقون بدنیم دینجه‌له‌جاق
باشیم اوسته باش‌آچوخ حضرت زهرا گله‌جاق
گوره‌جاقدور بدنیم قانیمه غلطاندی باجی
خنجـر آلتینـدا گورنـده یـارالی قارداشوی
یوم گؤزون باخما باجی تؤکمه یوزه گؤزیاشوی
اوجـادان آغلامـا ویرمـا یوزه آچما باشوی
صبر ایله صابرین آخر یئری رضواندی باجی
شاعر: صابر
زبانحال امام در شهادت حضرت علی‌اصغر
زینبیـم گـل بـالام قانه باتدی امدی پیکانی گؤز یومدی یاتدی
گئــت دئنـن بختی قاره ربابه اصغریم سینـوین داشین آتدی
مـن دئدیم سووئرللر ایچر سو ایلیـر قمــری لر مثلی «کوکو»
بولمدیم بعضی اوچی سوورمیش اوخلانــا سـو کنارینده آهو
آل بـو قنـداقی منـدن آماندی غصه‌دن قلبیمین باشـی یاندی
بولمـرم اوخ نجـه دگـدی زینب کئچدی اوخ ساق قولوم پارچالاندی
حرمله قویدی بیر اوخ کمانه اصغرین دوتدی حلقین نشانه
تشنـه قربانیمـه دگجین اوخ قنداقـی دوشلوگی باتدی قانه
گوئیــا هئچ یارالی دگـولدی گل کیمی باخدی پیکانه گولدی
گئت ربابه‌دئه باشون ساق اولسون وئردیگون غنچه بیر دسته گولدی
اصغریمه او پیکان چوخ ایدی پهلوانی ییخان بیر اوخ ایدی
آرزیمین گوللری اولدی پـرپر گوئیا اصغریم هئچ یوخویدی
تیتـره‌دی اوخ دگنــده ایاقـی تیتـره‌دیم منـده اصغر سیاقی
بوسه آلدیم بوغازیندن افسوس بوسه سیز قالدی سولمیش دوداقی
اوخشیور گوزلریم ابره اوغلوم التمـاس ایلورم صبره اوغلوم
چوخ چتیندی آتا اؤز بالاسین اؤز الیلـن قویـا قبـره اوغلوم
قارداشیم اولمه سیدی گلردی اود دوتان قلبیمه سـو سپردی
من قویاندا سنی قبره اوغلوم قبروین اوسته توپراق تؤکردی
یات دئدی ای گـل پرپر اوغلوم گئت سنی فاطمـه گوزلر اوغلوم
سولماقین غنچه وقتینده والله قارداشیم محسنه بنزر اوغلوم
خیمه‌ده سوسن و یاسیم آغلار گوزلریم مثل احساسیم آغلار
بولسـه میـداندا آواره‌یم من حالیمه قولسـوز عباسیم آغلار
شاعر: غفاری
زبانحال امام حسین هنگام وداع
قتلگاهیده قارداشون حسین اولسـا شمـرله روبـرو باجی
تار زلفـووی توکمه عارضه یولما ساچلارون موبمو باجی
هر باشون که عشقی ابتلاسی وار باشه یتمین بیر بلاسی‌وار
هر کسـون منـه اقتداسی‌وار قانیلن ایـدر شستشو بـاجی
منکـه گلمشم نشـر حکمته وار تحمّولـوم هـر مـصیبته
چوخ لزومی‌وار اهل دعوته طبع بردبار حُسْن خو باجی
وار سنون بیوک بیر مَتانتون صبـر و طاقتـون استقامتون
حالیمی گوروب پوزما حالتون شیـوۀ رضـا بودی بو باجی
عاشقون گرک فکری باز اولا شرح هجـردن بی‌نیـاز اولا
عیش خوش اودور بزم راز اولا بی‌تکلـم و گفتگــو باجـی
عشق سرکشون چوخ مرامی‌وار آیری نشئه‌سی آیری جامی‌وار
هـارداکیم تَجَرُّد مقامی‌وار بی‌بهـادی جام و سَبو باجی
قتلگه دیمه گلستاندی بو طُور جَلوه‌ئی دِلستاندی بـو
صدر مکتب امتحاندی بو طرح حلّ اولور حیّ هو باجی
من بـو گلشنه ایلـرم روان نهر نَحْردن چشمه‌چشمه قان
هاردا گورموسن بیله باغبان بیلـه آبیـار بیـله جـو باجی
هاردا من دوشوب جان ایدم فدا جُوی خوندن اولمارام جدا
مقصدیـم بودور ایتمیم اَدا صون نمازیمی بی‌وضو باجی
من بیـوک فرامینـه حاملم رُشـد فکــرده فـرد کاملـم
شُکروار که بـو لطفه شاملم ویرموری منه کیمسه سو باجی
اود دوشه اگر خیمگاهیمه همعِنــان اولا سـوز آهیمـه
یوخ دخالتـی طـیّ راهیمه نعــرۀ «اَلا حَــرِّقوا» باجـی
اوندا که چخار خُلْددن آنام آغلیوب دیر وای عزیز بالام
اوندا بول که ختم اولدی قتل‌عام اولدی شوکتون زیر و رو باجی
اوندا صبر قیل طعن دشمنه گلمسون گران هر جفاسنه
باشیم اوسته گل‌گور نجه منه ایستی قوم اولوب پَرّقو باجی
گورنه یاتمشام خواب نازیلن دلخوشام فقط بیـر نمازیلن
ایلـرم بیـوک بیـر نیازیلن خیــر امّتــی آرزو باجــی
باش یارا بوتون عضو تن یارا جمله طول و عرض بدن یارا
اوخ یاروب گیچوب حدّدن یارا قـان آخار چوله سوبسو باجی
گورسن اکبریم غرق یاره‌دور تــاروپود تـن پـاره پاره‌دور
منحصر بفرد بیر بو چاره‌دور تــار زلفلـه قیـل رُفو باجی
پـاره پیـرهن بـار جان اولور بارماقیمدا گوزدن نهان اولور
سهـم غـارت سـاربان اولور چوخدی بوردا سرّ مگو باجی
پاک‌ای هـدف عشـق بی‌نظر شـام و کوفـهدن ایلمـز حَذَر
یارون آختاران چوللری گزر سوبه‌سو باجی کوبه‌کو باجی
نیزه‌نی باشیم نَخل طور ایدر صحن مَطبخی غرق نور ایدر
هاردا من اولام حق ظهورایدر گوسترر اوزون رنگ رو باجی
رهبرم هامـی اهل خِیره من فرق قویمارام یار و غیره من
باش چکم گرک پیر دِیره من بی‌ثمـر دگل جستجـو باجی
حشـرده منــم قـاسم نَعیم منده‌دور اوگـون امر مستقیم
پیــر درگهیم هنـدی قدیم قویمـارام اولا زردرو بـاجی
شاعر: هندی
زبانحال حضرت زینب در وداع با امام
گل بیر دولانوم باشووه گیت تاجداری زینبون
قربان گیـدن یولاّریـوه جانِ فکاری زینبون
هر یاندان اوز امّیدیمی کسدیم بوگون من بینوا
بو چولده گوز تیکدیم سنه ای ماسوی‌اللّهه رَجا
سنده گیدورسن بس نئجه تاب ایلیوم ایئتموم نوا
یوخ یدّی قارداشدان قالان بیر غمگساری زینبون
باغریم حسین قان باغلیوب وار محضرونده چوخ سؤزوم
امّا دیلیم دوتمـور دییم مأیوسم عمرومدن اوزوم
غصّه گلوگیر ایلیوب ویرمـور امان آغلار گوزوم
وار حقّی گوزدن خون دل گرایئسته جاری زینبون
تاپشوردون اطفالون منه ای قُطب افلاک و سمک
یالقوز بیر عورت نیلسون قرخ مین قوشون یوخ بیرکمک
چکمـور گریبانیمـدن ال هشتــاده‌دین قـاره لچک
گلمور اجل تا گورمسون بو گیروداری زینبون
باشدان آتـام حیدرکیمی قانون آخور گوز قاشیوه
باغریم اوقان تک قان اولوب آند اولسون اول گوز یاشیوه
گلمور دیزیم بیر آز دایان زینب دولانسون باشوه
نه دیزده نه دلده حسین وار اختیاری زینبون
گیتمه بویون قربانی دور قول بوینووا بیرده سالوم
باس قانلو باشون سینمه تا جدّیمون عطرین آلوم
روحیم امیدیم عزّتیم گل قویما قارداشسیز قالوم
سن اولماسان اولماز یقین عزّ و وقاری زینبون
قیزلار باخوردی خیمه‌ده ممکن دگولدی کشف راز
یوخ بوردا ایمدی اهلبیت ای خسرو ملک حجاز
وار دلده بیر گیزلین سوزوم عرض ایئتماقا قیلسان مُجاز
عرض ایلرم ای روحیدن آرتوخ نگاری زینبون
سویله گوروم گورماقلوقا بیرده گلورسن عترتون
قویدون پریشان یا باجون زلفی کیمی جمعیّتون
آخـر سفـردور بوسفـر اولمـاز دوباره رَجعتون
عمرونجـه قلبینـده قالار بـو انتظاری زینبون
ایئتدی اشـاره باشیله یعنـی باجی باخ نیزه‌یه
باشیم کسیلسون آز قالور گلسون فلکلر لرزیه
ذات خـدا ایتسـون بپـا عرشینده بـزم تعزیه
اولسون او بَزمه منعکس تا آه زاری زینبون
زینب ایئشیتجک بو سؤزی باش آچدی گلدی شیونه
عرض ایلدی قارداش حسین بیر خواهشیم واردور سنه
تک‌تک وداع ایئتدون هامی اطفالی تاپشوردون منه
بو فیضـدن قالدی ایکی لاله عُذاری زینبون
ایله عطش دلدن سالوب قالموب اولاردا صبر و تاب
غشّ ایلیوبلـر خیمـه‌ده ای نـور چشـم بوتراب
گُل یوزلرینه سپماقا یوخ خیمه‌ده هـر چند آب
اشگیلـه امّـا دیـده‌ده وار جویبـاری زینبون
ایله تواضع گل اوزون گور اول ایکی نورس گلی
تا دللرینـده قالمـاسون حالـه گلنـده نسگلی
القصّـه گَتـدی خیمیــه زینب شـه دریـادلی
حالی پوزولدی قارداشین گیئتدی قراری زینبون
گوردی یوز اوسته قول بویون بیرجفت مه منظر یاتوب
اشگیله توپراق ایسلانوب یوز گوز قرا تللّر باتوب
گورجک بوحالی شاه‌دین اؤز فکرینی باشدان آتوب
گور زلفی چوخ آشفته‌دور یا روزگاری زینبون
دوتقـون سسیلـه ایلیـوب زهـرا قیزی اوّل ندا
گوردی اویانمولاّر اولار بولدی که وار بیر ماجرا
تا اَل یتوردی قووزاسون گوردی اولوبلر یوخ صدا
ویران اولوبدور صبردن محکم حِصاری زینبون
باخ گور بو درد و محنته داش اولسا دل ایلر دوام
واللّهـی بیـر زینب دؤزر بیــرده امام تشنه کام
ذیحقّدور قان آغلاسا صاحب‌زمان هر صبح و شام
اولسون نقدری آلمیوب داد اشگباری زینبون
ایستردی آیریلسون حسین زینبدن آغلاردی گؤزی
ویرّم قسم اول‌وقتینه بیر سن بولورسن بیر اؤزی
قورتار فشـار دهردن لطفاً قبول ایئت بوسؤزی
مخلوقه محتاج ایئتمه ای پروردگاری زینبون
شاعر: حسینی
زبانحال حضرت زینب در وداع امام
حسیـن تعجیللن گئتمه ایاق ساخلا دایان قارداش
دالونجه گورگوزوم یاشی نجه اولموش روان قارداش
دوشوبدور جانیمه رعشه گلوبدور خاطریم درده
گوزوم یاشـی آخار آمال کاریم نقش اولور یئرده
بویور قارداش گوروم گئتسن گلورسن خیمیه بیرده
و یا اینکه امان وئرمز سنه بو کوفیان قارداش
سنـه زحمتدی عرض ائتسم من نالانی بیر دیندیر
و یا کی تک به تک بو جمع سرگردانی بیر دیندیر
جوان اوغلی اولوب قلبی یانوب لیلانی بیر دیندیر
یاخوندی آیریلا روحی ائده تسلیم جان قارداش
شــرار نــار هجــرانه وروب بیلــه اتـک گئتمه
سنی یالقوز گوروب روحیم گلور آردونجه تک گئتمه
یول اوسته صف چکوب هشتاده تک قاره لئچک گئتمه
دولان بیر اهل بیتون گور نجه ایلر فغان قارداش
سکینه مرغ بسمل تک حسین چوخ اضطراب ایلر
اونون اول مضطرب حالی منی بی‌صبر و تاب ایلر
ایله حسرت باخور آغلور ئوره‌‌ک باشین کباب ایلر
تسلـی وئـر اولا آرام بلکـه بیـر زمان قارداش
آنام زهرادن ازل گون دؤزوم سرمشقنی آلدیم
جهاندا هر غمه دؤزدوم عجب دور اؤلمدیم قالدیم
اولوم میداننـه آخر سنی عطشان یولا سالدیم
منیم تک بیر مصیبت‌کش وئرن یوخدور نشان قارداش
آتام رحلت ائدن گوندن اگر چه شور و شینیم وار
حسین ایله حسن تک من دیردیم نور عینیم‌وار
حسن کی گئتدی دنیادن دئدیم قارداش حسینیم وار
گئدورسن سنده بس نیلوم من بیخانمان قارداش
دایان اطرافوی بیرده حسین اهل حرم دوتسون
دئمه شه سن سپاهون یوخ سنی نامحترم دوتسون
اجازه وئر قباقنده باجین زینب علم دوتسون
شکسته گورمسون حالون باخاندا کوفیان قارداش
بو قدری بی‌پناه عورت اوشاق غربت ولایتدی
بدنلـر بیـد تک لـرزان حسین گویا قیامتدی
سنی اؤلدورسه‌لر بوللم بو قومون قصدی غارتدی
نه باشلاردا قالار معجر نه رخت بانوان قارداش
شاعر:شهاب
زبانحال حضرت زینب در وداع امام حسین
سن حسین کفن گیوبسن حرمون نوایه گلسون
خبـر ائـت آنـام بتــوله اؤزی کربلایه گلسون
توخییوب او کؤینگیکه اؤزی بوقچادان گتورسون
الینــه آلـوب امـانت کفنـی سنه یئتورسون
اؤزی تشنه‌لب منایه سنی خیمه‌دن اؤتورسون
صـورا وئرمگـه تسلـی مـن بینوایـه گلسون
سنـه بـزم غـم مهیـا گره‌‌ک ایلیم بو ساعت
من ائدم دعا سوسوزلار ائده آمینیله خدمت
ایله بزم غمده خوشدور ایلسون آنامدا شرکت
باش آچوب الینده معجر سنیچون دعایه گلسون
کومکه وار احتیاجیم بو منیم بلا گونومدی
سنون آیریلیق گونوندور نیلیوم قرا گونومدور
بولــورم قیـامتیمدور غمه مبتلا گونومدور
دئه گوروم کیمی قالوبدور باجوون هرایه گلسون
بـو وداع آخـرین دور بولورم حسین سوزوندن
دوشوب عترت و حریمون بالا قیزلارون گؤزوندن
اؤلوب اکبرون اودورکی بیله دویموسـان اؤزوندن
ئوره‌گونده نه غمون‌وار من مبتلایه گلسون
ستمیله ای بو چولده پوزولان جلالی قارداش
گؤزی یاشلی قاره گونلی قالان اهل عیالی قارداش
نئله‌سون قیـزون رقیه او حرم غزالی قارداش
سنه اورگشوب دالونجا نقدر نوایه گلسون
دوشرم دالونجه قارداش دئمه ردوی ایتورم
بـو سوسوز بالالاریـلا گؤیه نالمی یئتورم
گله بولمه سه علیلون کومک ایلیوب گتورم
اودا تا دالونجا تکیه ایلیوب عصایه گلسون
دئمـورم بـو آیریلیقـدا مـن دل‌کبابـی دیندیر
گوزی یاشلی قاره معجر حرمون ربابی دیندیر
بالاسی اؤلوبدی چوخدی بولوسن صوابی دیندیر
کیم اونی سالوب بلایه اؤزی مین بلایه گلسون
سنون عشقویله غنچه گلینی وئروب بوداقدان
بالا غصه‌سی آنانی نجه گور سالوب ایاقدان
گلـه بیلمیـور قباقه دایانوب باخور اوزاقدان
اوتانور منیم یانیمدا اودا التجایه گلسون
شاعر: انور
زبانحال حضرت زینب در قتلگاه
گوز یاشمـی یارالاریـوا مرهـم ایلـرم
بولسون هامی کی هریارانین بیردواسی وار
مرهــم قبـول ایلمیـن یاره حشـره‌تک
زخم شهـادتین دی دوادن ابــاسی وار
باشدان ایاقه هر نه یارا جسموه دگوب
تک زینبون ئورکده بیر ایله یاراسی وار
چوخ یاره‌لر دگوب منه چوخ تازیانه دن
هر تازیانه نین بیر اوزون ماجراسی وار
فکر ایلدیم گئچن گجه تک قالدی قارداشیم
قلبیم دئـدی داریخما یانیندا آناسی وار
هجرونده زینبین آغارار زلفی غم یئمز
چون قاره زلفدن قره بختین قراسی وار
درد و بلاسی باشیمیزون باشه یئتمیوب
الله بولور کـی باشیمیزون نه بلاسی وار
گـر چـه نــوای نــای غم‌انگیز اولور ولی
نـای دل یتیمــه نون اوزگــه نـواسی وار
بـی‌کس عیــال و عتــرتوی تاپشیـر اللهـا
هر کیمسه نون کی هئچ کسی یوخدور خداسی وار
صحرایه قیزلارون نه دئسون قاچماسون حسین
بیر قوش کی آشیانه‌سی یاندی هاراسی وار
باشـون گئدوبـدی کوفیـه مهماندی خولیه
کـول باشیمـه حـکایت مطبـخ‌سراسی وار
کرب و بلا هواسـی بیـزه سـازش ائتمدی
شامه گئداخ گوراخ اورانین نـه هواسی وار
هر لحظه تازه بیر غمه گردون سـالور منی
هئچ بولموری کی بسدی غم کربلاسی وار
غـارت گونونـده ایلـه قیامت قوپوب بیزه
حاشا کی محشرون ایله محشر نماسی وار
معجرلر اوستـه ایلمشوق بسکـه کشمکش
هر معجرون هامی بوله مین جان بهاسی وار
اولـدی بهـار فصلـی گلستانیمیز خزان
نـه باغبان نه بلبلینـون بیـر صداسی وار
بلبل‌لرین گوزونـدن ایراق پایمال اولان
گل برگ‌لرده زاغ و زغن جای‌پا سی‌وار
شاعر:ذهنی زاده
زبانحال جناب زینب در کوچ از قتلگاه
قارداش گیدورم شامه بو کشور سنون اولسون
بو کـرب و بلا مُلکی سراسر سنون اولسون
کوچ ایلییروخ کرب و بلادن بو زمان بیز
دفن ایلمدوخ سیزلری قالدوخ نگران بیز
قارداش‌بـاجیوخ بیـر آتادان بیر آنادان بیز
راضی دگلم جمله ستملر سنون اولسون
حیدردن اولوب چون سنه میراث شهادت
زهـراده قویوبـدور منه غم غصّه و مُحنت
بیربیر ایلیوم قـوی بـو مصیبتلـری قسمت
زنجیر منیم نیزه و خنجر سنون اولسون
قارداش ایدورم جسمووه هر قَدر نظاره
گلمـز بدنونــده عــدد زخــم شمـاره
نعشون باشینا قوی دولانوم بیرده دوباره
گوزیاشی منیم پیکر بی‌سر سنون اولسون
میندن یوخاری گر یارا سینونده سنون‌وار
یوز اونجه جگر داغی من غمزده‌نون وار
یانونــدا سنــون اکبــر گل‌پیرهنون وار
بیمار منیم قوی دیوم اکبر سنون اولسون
ایسترسـن علـی‌اصغـری بیحــدّ و زیاده
عطشاندی سو ویر ساخلا اونی کرب و بلاده
مَنلـن بـو سکینـه گیـده‌جاق شامه پیاده
بسدور بو سکینه منه اصغر سنون اولسون
دامـاد سنـون تـازه گلیـن زینب زارین
قوم‌اوستی سنون کُنج خرابه بو فکارین
کلثومی گوتورّم دولاناق کوفـه دیارین
عبّـاس علمـدار دلاور سنـون اولـسون
یئتمیش بیـره دین‌وار شهدا دور و برینده
قرخ قاره گِیَن واردی بوخونین جگرینده
انـوار خــدا جلوه‌لنــور قانلــو سرینده
من مونس غم رأس مُنوّر سنون اولسون
شام اهلی بیزه عیش و طرب بزمی قورالّار
اهـل حرمـون بزم یزید ایچره دورالّار
پیغمبر اؤپَـن لبلــرووه چوب ویرالّار
من صبر ایدرم یاره‌لی لبلر سنون اولسون
کَهف آیه‌سینی سن اوخوسان شام و سحرگاه
منــده ایــدرم همدمیمــی ناله‌ئیلــن آه
امّــا آنــام‌اوغلــی بـو گراندور منه بالله
دشمنلر ایچینده بو حرملر سنون اولسون
شاعر: گنجی
زبانحال زینب‌کبری در غارت خیام
غارته ال آچدی لشگر داده گل اماندی قارداش
اودلانوب خیام یکسر ظلم اودیله یاندی قارداش
سویولاّ خوردا قیزلارون قوم ستمگر حسین بورحمسیزلر
قتلگهده یوخسا قارداش گون کیمی یئتوب زوالون
شمر گلدی حکم ویردی گیئتدی غارته جلالون
قورخودان چیخوب حرمدن دوشوب چولّلره عیالون
داده یئت گر اؤلمیوبسن خیمه‌لر تالاندی قارداش
نه بو قوم کینه‌پرور جور و ظلمدن دویولّار
نه حریـم مصطفـایه حـرمت حرم قویولّار
هر بلاکشـه یئتولّر هم وورولاّ هـم سویولّار
ناله و فغان و شیون گؤیلره دایاندی قارداش
رنگرنگ مُحنتیلـه آز زمانـدا مـن بویاندیم
کعبۀ وفا خلیلین گوردوم آتش ایچره یاندیم
باخمادیم اونی او اوددان خارج ایلدیم دایاندیم
هر قضایه صبر قیلدیم بولدیم امتحاندی قارداش
بیر اشـاره‌تونلـه دائـم بو ستم رسیده باجون
هر غمه دوزر اؤلونجه زار و غم‌‌کشیده باجون
منتظردی پیک مرگه خوشدی بوامیده باجون
اشگ چشم انتظاری سیل‌تک رواندی قارداش
لشگر ستم روادور وار نه زَیب و جاه آپارسون
بی‌پنـاه عیـالون آخـر بس کیمه پناه آپارسون
بیر امان یئره بوجمعون یوخدی داده‌خواه آپارسون
بونه دوره دور نه دوران بو نئجه زماندی قارداش
بوینونا وَبال قتلون یوخسا بیر ستمگر آلموش
اَلبِشـارۀ اَلبِشـارۀ اهـل شامـدن اوجالموش
گون یوزینه بو خبردن پرده‌ئی سیاه سالموش
عرش و فرشه لرزه دوشموش مُنقلب جهاندی قارداش
من او خسته عندلیبم یوخدی بیر خبر گُلومدن
صحبت گل و گلستان دوشمز اؤلمه‌سم دیلیمدن
دلشکسته و غریبم چون چیخوب ائلیم الیمدن
بی‌سبب دگل که شغلوم ناله و فغاندی قارداش
صورتاً ایله پوزولدی شوکت و جلال زینب
وار یـری اگر جهانی دولدورا ملال زینب
سنسیز اولموش آستینی پردۀ جمال زینب
سرو قدّی بارِ غمدن غصّه‌دن کماندی قارداش
آت دوشونده گه یتیمه قیزلاری پوزوب قُوُولاّر
دیزلرینـده طاقت اولمور گه قاچولّاگه دورولاّر
الّلرینــه تازیانــه گــه یِتَــن کیمـی وورولاّر
شور حشر اولوبدی برپا رستخیز عیاندی قارداش
دورِ خیمه‌گاهی دوتموش بسکه رحمسیز قبایل
بیـر رَهِ گریـز تاپمـور دختـران مـه شمایل
گر یازیلسا بو مسائل عالمی دوتـار رسائل
هر سؤزوم کتاب غمدن مختصر بیاندی قارداش
شامه‌دین بو جور و ظلمون واردی امتدادی بولّم
نه فرح گوروب نه دلدن یرده جان ویرونجه گولّم
آغلارام صباح و شامی من بونیسگیل اوسته اؤلّم
ظلم الیله خیمه‌گاهون غارت اولدی یاندی قارداش
شاعر:صافی
زبانحال امام حسین به خواهرش
وقت ظهر اولوب یئتیشدی عمریمون زوالی زینب
دور ایاقه گیت خیامـه ای باشی بلالی زینب
شـرط اوّل وفــادور ماسـوانی گـوزدن آتماق
باش ویروب سرِ سِنانه حق یولوندا باش اوجاتماق
اهل عشقه خوشدی بیله ایستی قوملار اوسته یاتماق
گیچمیشم بوباش و جاندان مست عشق اولالی زینب
گلشـن وفـاده سینـم رنگرنگ گل آچوبدور
مین دیلیله زخم جسمیم شرح حاله دل آچوبدور
قلبیمی دَلوب گیچوب اوخ باب درد دل آچوبدور
وار یارام سیزیلدیاندا اوزگه بیر مَقالی زینب
قسمـت ایئتدیلر بلانی بیله دوشدی طرح قسمت
اوچ‌گون اوچ گیجه چکوم من ایستی قوملار اوسته زحمت
سـن منیـم حرملریمـدن بیر دقیقـه ایئتمـه غفلت
ییق باشوا وار باشوندا قِرخه‌دین عزالی زینب
من بویانمشام بـو قانه باری سن بویانما باجی
چوخ یانوب یانقلی قلبون بیر علاوه یانما باجی
قالدی باشسیز اهل‌بیتیم دورما گیئت دایانما باجی
قویما چولّلرده داغیلسون قارداشون عیالی زینب
ایمدی باش آچوب حرملر تا جانیندا جان وار آغلار
دیلده نغمــۀ حسینـی متّصـل سیزیلـدار آغلار
سنکه گلمیسن سکینه‌م ساکت اولماز آغلار آغلار
ضعف ایدوب دوشر نفسدن گُل کیمی سارالی زینب
گیـت اسیرلیـق لبـاسین اهل‌بیتیمه گییندیر
ناقیــه اوزون اولاری استـراحتیلـه مینـدیر
خورداجا اوشاقلاریمی چوخ محبّتیله دیندیر
سالگلن منیم باشیم تک باشه مین خیالی زینب
باجی بیله یولما زلفون غم بساطین ایمدی قورما
وار هواده چوخ حرارت بوگون ایستی سینده دورما
گیئت من اولمِیونجه هرگز گل یوزیوه سیلی وورما
وورما سیلی ایئتمه نیلی سن او رنگ آلی زینب
باشیم اوسته آچما باشون دور و برده واردی دشمن
یامنیم گوزومی باغلا گورمیوم باجی سنی من
یا یانیمدا وورما باخما بـو یارالی جسمیمه سن
گورمیوم سنون او حالون گورمه‌سن بوحالی زینب
موج بحر خونِ جسمیم تا آشوبدی باشدان آغلا
سنده بیر دقیقه چکمه اَل بو قانلو باشدان آغلا
تا منیم جانیمدا جان‌وار آغلاسان یاواشدان آغلا
دؤزمرم سسون ایئشیتسه کوفه‌نون رِجالی زینب
بو بلالی باشیمون چون باشه یتمیوب بلاسی
شمر الینده خنجریله وار بیر اوزگه ماجراسی
باشیمی کسر یانوندا یوخ او ظالمون حیاسی
بیحیانی سینم اوسته گورمه‌سن حیالی زینب
گیت دیزون قوجاقلا اگلش وئرمه حالتیوه تغییر
اوندا که باشیم کسیلدی باشه یئتدی امر تقدیر
سسلرم جـدا باشندا من اوجا سسیله تکبیر
اوندادور تدارکون گور شامه کربلالی زینب
شاعر: هندی
شام غریبان در کربلا
گلمیشوخ ای شیعه‌لر شام غریبانه بیز
ویرماقا باش ساقلیقی زینب نالانه بیز
بوگجه بیز گلمیشوخ نوحه ایداخ آغلیاخ
آغلیوب اول سروره سینه‌میزی داغلیاخ
تشنه اؤلـن سروره جمله عزا ساخلیاخ
شیونیله گلمیشوخ جمله شبستانه بیر
چون باتوب اؤز قانینه اکبر شیرین زبان
حلقین علی‌اصغری اوخلیوب اول کوفیان
بی‌گنه اولموش شهید چون او ایکی باغریقان
باعث اودور گلمیشوخ ناله و افغانه بیز
آغلاروق اول سرورین نازلی علمدارینه
جملـۀ اصحــابینه یــاور و انصــارینه
حیف اولا عباسین اول قامت و قوللارینه
یئتسه اَل عرض ایلروخ سرور مردانه بیز
یئــرده قالـوب پیکـر شاه زمین و زَمَن
نیزیه گئچمیش باشی قانی آخور نیزه‌دن
کیمسَنَه یوخ ایلیه غسل و حنوط و کفن
دوشمیـاق آغلار نئجه کوه و بیابانه بیز
زینب و کلثوم اولوب خصمه اسیر و فگار
هر بیری بیر محنته بوگئجه اولموش دچار
سیّــد سجّــاددَه نالــه ایـــدر زار زار
سس ویراق اول بیکسه ایمدی یانا یانه بیز
نازلی سکینه اولوب بوگئجه زار و ملول
ظلمیله سیلی ووروب شمر شریر و جهول
تتریری بو ظلمیدن عرش، خدای رسول
آغلوروق اول بیکس و حالی پریشانه بیز
آغلیـون ای شیعه‌لر کرب و بلا شاهینه
باخمـادیلار زینبـون اود یـارادان آهینه
ظلمیله اود ووردیلار خیمه و خرگاهینه
کـاش یانیـدوخ تمـام آتـش سـوزانه بیز
شاعر: ذلیل
زبانحال حضرت زینب در کوچ از قتلگاه
ای شـه مظلوم حسین وای وای
بیکس و مظلوم حسین وای وای
دوغرادیـلار قـوم عـدو اکبــرون اوخلادیلار تشنه علی‌اصغرون
شیعه فداسـی اولا نسـگل‌لــرون ای شه مظلوم حسین وای وای
گل بدنـون اوخلارا آمـاج اولوب خیمه‌لرون ظلمیله تاراج اولوب
عورت اوشاق نصرته محتـاج اولوب ای شه مظلوم حسین وای وای
شمـر ستم‌پیشه کسوب‌دور سـرون آتـلار ایاقینـده قالوب پیکرون
ای آتـام‌اوغلی هانـی بس اللرون ای شه مظلوم حسین وای وای
ایستی قوم اوستی بو یارالی بدن آرتوری بو بیکسه درد و محن
اولمادی ممکـن سنه ایلوم کفن ای شه مظلوم حسین وای وای
قارداش حسین گردش تقدیره باخ صبح و مسا ناله شبگیـره باخ
گـردن سجـادیـده زنجیـره باخ ای شه مظلوم حسین وای وای
قانلو باشون نیـزه‌ده شامـه گئدر آیــۀ قــرآنی تــلاوت ائـدر
شمـر عیالــون ایلیــوب دربدر ای شه مظلوم حسین وای وای
گئتدی بو صحـراده جلالون سنون غارت اولوب مال و منالون سنون
قول قولا باغلاندی عیالون سنون ای شه مظلوم حسین وای وای
کـرب و بـلا ملکـی سنه عرش دور ایستی قوم اوستی قوری یئر فرش دور
زینبون اؤلسون بو نیجه نعش دور ای شه مظلوم حسین وای وای
قمچـی ویـرار باشیمه شمر دنی زینبون عرشه اوجالوب شیونی
سنسیز اسیـر ایلدی دشمـن منی ای شه مظلوم حسین وای وای
وئرمز امان شمـر و سنـان آغلیام نعشوون اوستونده سینه داغلیام
اولمادی ممکن گوزووی باغلیام ای شه مظلوم حسین وای وای
شامـه طرف کوچ ائدوری قافله هاردادور عباس آلا بیـرق اله
قافلــه اهلیــن یئتــوره منـزله ای شه مظلوم حسین وای وای
ویردولا شام اهلی باشون نیزیه عترتون آردونجه گیدیر کوفیه
یوخسا قوناقسان بو گجه خولیه ای شه مظلوم حسین وای وای
شاعر: مضطر
زبانحال حضرت زینب در کوفه
گیرنده کوفیه زینب باخوب جدا باشینا
دییـردی درد دلین اؤز یارالی قارداشینا
گلوبدی نیزده قانلو باشین دیله قارداش
کلام حقـی اوخـور اهل باطله قارداش
دوباره یاره ووروبلار آخار باشون قانی
یانار بلالی باجون بیله نیسگیله قارداش
اوقان دولان گوزون آچ دربدر عیالووه باخ
ووروبدی بوینوموزا شمر سلسله قارداش
بلالی باشوین عشقـی سالوب بلایه منی
بو حال زاریمی بیرکیمسه یوخ بوله قارداش
اوقدر قمچی ووروب شمر قوللاریم گووروب
بو غملریله باجون اؤلمیوب هله قارداش
باشمیدان آلدیلا غارت گونونده معجریمی
ائدوم نچـاره‌کی محتاجم حائله قارداش
ندن سوروشموسان احوالینی بوخون‌جگرین
باجونی هاردا گوزوندن سالار بیله قارداش
سینیق کجاوه‌ده باش آچوخ بازاری گزورم
بو بخت قـاره‌ده بـاخ بیر تحمله قارداش
بـو اهـل کوفه تصدق ویرولّه قیـزلارووا
دوشوبدی عترتوون امری مشگله قارداش
حسینـی زینب کبـری دیلینجـه یاز بیرده
گلوبدی نیزه‌ده قانلو باشون دیله قارداش
شاعر:حسینی
خطاب حضرت زینب به اهل کوفه
ای کوفـه‌لیلـر ائـدون مروت داش آتمیون اول یارالی باشه
بسـدور اون‌ایکـی دگن جراحت بیـر یاره‌لــی ابتـلالی بـاشه
طغیان‌نـدن ایلیســوز جفـاده آیات اوخوری سـر جـداده
چوخ یـاره دگوبدی کربلاده بـو نیـزه ده‌کـی بلالـی باشه
بسدور کسیلوب سوسوز قفادن صبـر دل آلوبـدی مصطفـادن
ظلـم ایلمیـون دویـون جفادن جسمیله دوشـن آرالـی بـاشه
بوباش گتوروب جهـانی درده وار منخسـف حالتـی قمـرده
قان کول گوروسوز چکوبدی پرده افـلاک وفـا هـلالی بـاشه
دعوت ایلـدوز بونـی عـراقه حرمت عجب ایلدوز قوناقه
ظلوموز دایانوبـدی نه رواقه آز ظلم ائدون اول بلالی باشه
زینـب نجـه گلمز آه و زاره تؤکمز نئجه خون دل عذاره
وار سجده گهینده تـازه یاره بسـدور بو ستم وفالی باشه
بسدور الی جسمدن اوزولدی داش آننینا دگدی قان سوزولدی
رخسارینه نجم‌سا دوزولدی رحم ایلیون اول یارالی باشه
شاعر:نجمی
زبانحال امام زین‌العابدین
اهل قبیله گلموسوز دفن ایدسوز اؤلنلری
سیز کمک ایلیون منه من تانورام بَدَنلری
قافله کوچ ایدنده من دشمنه دستگیریدیم
یرده قویـوب بدنلری گیتماقا ناگزیریدیم
مجلس کوفه‌ده اؤزوم منده بوگون اسیریدیم
امر خدا یئتیشدی گیئت دفن ایله جان‌ویرنلری
بو چوله منده گلموشم محفل غم قورام گیدم
کاسۀ چشم پُر نمی اشگیله دولدورام گیدم
بوردا آتام جنازه‌سین قبرینه تاپشورام گیدم
کوفـه‌ده منتظردیلـر باجیلاری حرملری
اوندا که ایستدی آتام بو چولی مسکن ایلسون
پول ویروب آلدی بو یئری وادی اَیمن ایلسون
دینـه فـدا اولانلارون نعشینـه مـدفن ایلسون
تا که زیارت ایلیه حَشره‌تک ایستینلری
بیکس آتام حسیندی بو جسمده چوخ یاراسی وار
پیکــری پاره‌پــاره دور نــه اَلـی نه لباسی‌وار
دشمـن الینـده باشینون غصّه‌لی ماجـراسی‌وار
سیرایدر اَل به اَل اودور نیزه باشیندا چولّلری
اوچ‌گون اولور بوگون قالوب یئرده بو جسم نازنین
ظلمیلـه پایمـال ایـدوب آتلار ایاقی پیکرین
بَندِ زَر اوسته اهرمن کسـدی بِلکـدن الّلرین
گیئتدی بـوچولـده نالیه فاطمه‌نی پیمبری
سیز چکیلون دورون باخون جمله جوان و پیریله
عالـم غَیبـدن کمـک وار مــن دستگیـریله
تا که آتام جنازه‌سین قبره قویـام حصیـریله
گون قباقندا قالمیه دفن ایلیم او سَروری
قارداشیم اکبری ایدوب قطعه به قطعه تیغ تیز
اولـدی آتام حسین او دم قدّ خمیده اشگریز
قانلو جنازه‌سین قویون قبره ایاق طرفده سیز
بسکه آتاسی چوخ سُوَر اوغلی علیّ‌اکبری
توش اولدی ای بنی‌اسد مین غمه بیر باشیم منیم
کشف ایلوری اؤره‌ک غمین گوزده‌کی گوز یاشیم منیم
وار بُـو اؤلنلر ایچره بیر خورداجا قارداشیم منیم
دفن ائدرم آتاسینون سینه‌سی اوسته اصغری
قاسم عم اوغلومون یری ایستورم آشکار اولا
قبـری علـیّ‌اکبریــن قبرینـه همجوار اولا
ایستمورم بو دوره‌دن آیری دوشـه کنار اولا
دفن ایدون ای بنی‌اسد بوردا او ماه‌پیکری
بلبلون عشقـی وارگله قلبیمی حیرته سالور
بـزم وصالـی آختـارور قیمت جانیمین آلور
دفن ایلیون بو دوره‌ده هر نه صحابه‌دن قالور
پادشهـون اولا گرک تحت نظرده لشگری
قالدی عموم جنازه‌سی گلّم اؤره‌کده شیونه
الده چتیدن حمل اولا جسم شریفی مَدفنه
نعشینی قبره قویماقا گلدی بابام کمک منه
پوزدی بو غملو مَنظره دلدن آتاسی حیدری
شاعر:ریاضی
در تنور خولی از زبان حضرت صدیقه طاهره خطاب بسر مبارک حضرت سیدالشهدا
ای نــور عینیـم منـزل مبارک بیکس حسینیم منزل مبارک
چوخ اشک چشمون بنزتمه سیله یاندیـم منـی گل یاندورمـا بیله
دوربیـر آنـاوا خوش گلدون ایله ای نــور عینیــم منـزل مبارک
دینـدور منـی مـن زهــرا آنـانم بـو دینممکـدن چوخ بدگمانم
سـن خانـه صـاحب من میهمانم ای نــور عینیــم منـزل مبارک
باشونــدو مشکـاۀ آیــات نـوره مطبخ سرانـی دؤنـدردی طوره
خولی اوتانموب قویموش تنـوره ای نــور عینیــم منـزل مبارک
لازیمـدویاتسـون بلبـل گل‌اوسته تاسایه سالسـون گل‌بلبل اوسته
دورسینمـه گل یاتمـا کول اوسته ای نــور عینیــم منـزل مبارک
کسمیشدیم ایمدی قان ایچره یانون خشک ایلییریدیم زلفمله قانون
ناگــه یئتیشـدی اؤز ساربانــون ای نــور عینیــم منـزل مبارک
ای پـــادشــاه مــلک مـــدینه اولــدون نشانـه شمشیـر کینه
سنسیز حسیـن بس نیلـر سکینه ای نــور عینیــم منـزل مبارک
وجهی ندور بس اَهلون آتوبسان چون اشک زینب قانه باتوبسان
اکبـر نولوبـدور یالقـوز یاتـوبسان ای نــور عینیــم منـزل
مبارک گوردوم ویروب‌جان‌یئتمیش‌ایکی‌جان بیر آغلیان یوخ اولدوم پریشان
گلدیـم دوتـام مـن شــام غریبان ای نــور عینیــم منـزل
مبارک گیـرم داغیلـدی جـاه و جـلالون تالانـه گئتـدی مـال و منـالون
هـاردا قالـوب بس بیکس عیالون ای نــور عینیــم منـزل مبارک
یوخسـا چکوبسن گوندوز اذیّت ایمدی اولوبسان بیر لحظه راحت
دور یاتمــا یاتمــاز اهـل محبت ای نــور عینیــم منـزل مبارک
گلدون وجـوده «صراف» عدمدن گتمـه کنــاره گل بـزم غمـدن
قوی نوحه اولسون جاری قلمدن ای نــور عینیــم منـزل مبارک
شاعر: صرّاف
زبانحال جناب رقیّه
خرابـه گوشه‌سـی عمّـه گتـوردی جانه منی
گلون چکون سیزی تاری بیر اوزگه یانه منی
آچون قولومی قوری یرده جان‌ویروم راحت
گلنــده شمــر اونــا ویرمیـون نشـانه منی
یوزیمه سیلی ووروب قورخورام دوباره وورا
خرابــه‌ده گتـــوره آه و الأمانـــه منــی
آلانــدا معجـریمی گورمــوشم شقاوتینی
آتون دوشونده قُوووب چوخ اُویان بویانه منی
گلنــده شامــه پیــاده یــولی گَلَنمَـزدیم
وورا وورا گتـوروب عمّه بـو مکانـه منی
او قَدر قَمچی ووروب ایمدیده باشیم آغرور
چوخ اینجیدوب او ووران دمده تازیانه منی
دیورسـن عمّه بابـان کعبیـه ایدوبدی سفر
نه سـوزدی بـو گتـورور دمبدم فغانه منی
آتـا سفــر ایلینــده قیــزین ایـدلّه اسیـر
کـه باغلیوبلــه بــو حالیلـه ریسمانه منی
ز بس آجام سوسوزام عمّه جان یوخوم گلمز
غریبـه خـوار ایلیـوب گـردش زمانه منی
اؤزوم اسیـر بویوندا دوشاخه قولدا طناب
بو اهـل شام مسلمان بولولّه یا نه منی
نجـه روادی مسلمانـه بیـر بیلــه ذلّت
روا گوروبدی قَضـا بیلـه امتحانه منی
خصـوص ایدلّـه منه شامیـان شماتتلر
بولـه بوله بیر عزیـزه شـه جهانـه منی
حسیـن گلشنینـون نــوگل بهـاریدیم
سُموم ظلم یتـوردی عجب خزانه منی
هــزارۀ چمــن حُســن اکبــرم عمّه
اَجل قوییدی یئتیدیم او نوجـوانه منی
دوشنده مشکله سن ذوقیا چوخ آغلا منه
اَلونـده درگـه خـلاّقه دوت بهانه منی
شاعر: ذوقی
زبانحال زینب‌کبری خطاب به ساربان
ساخـلا ناقه‌مـی کاروانیـدن واردی بیر قالان گیتمه ساربان
گر تاپولماسا سویگلـی بالام گیتمرم دایـان گیتمه ساربان
آخــر وداعنــده قـارداشیم تاپشوروب منه بیربیر عترتین
ایتمرم فرامـوش اؤلونجه من قارداشیـم حسینـون وصیّتین
شه اوزی بولـوردی یقین همین شاهزاده‌نیــن بیلــه ساعتین
ناقـه‌دن ییخـار ساربان قالور چولده باغْریقان گیتمه ساربان
چُوخـدی گرچه اوز اهل‌بیتنه اولشــه رَؤفــون محبّتــی
وارخصــوص بــو نـازنینله شاه بـی‌کسون اوزگه اُلفتـی
نیزه‌ده یـارالی باشی دوروب گیتمـوری او اُلفتـدی علّتی
گیتمز اوز بالاسی تاپولماسا حَشره‌دین اینان گیتمه ساربان
گورمـوسن نجـه سوز آهله کلِّ عالمـی یاندیرور یـاخور
نیزه‌ده آچورقان دولان گوزون متّصـل گَلـن یـولّارا بـاخور
تـوز کُولـه بَلَشمیش جمالینه اشگ دیده‌سی دمبـدم آخـور
من دؤزنمرم ایتسـه قارداشیم گوز یاشین روان گیتمه ساربان
نیزه اوسته حسرتله صـاق صولا قانلو گوزلرین هی دولانـدیرور
اوز بالاسینـون چـولده قالمـاقین سیزه‌لــره او رَمزیله آندیرور
گر دایانماساز سیز اوبـاش دورار اهــل کاروانــی دایانـدیرور
سانما بیر کسیک بـاشدی نیزه‌ده بولمـه ناتـوان گیتمـه ساربان
کیـم بولـور اونـون اقتـدارینی هر باخان گورور بیر یارالی باش
چوخ چالیشمیون بیجهت قویون مـن ایدیـم سیـزه ماجرانی فاش
ویرمیــون عَبـث نیزیــه تـکان ایتمیون عبـث کـوشش و تلاش
نـه گیـدر او بـاش نه قویار اولا کـاروان روان گیتمــه ســاربان
بولمورم ییخوب ایمدی ساربان یـا یئـره دوشـوب ناقه‌دن گیجه
گرگیجه دوشـوب بوگیچن گیجه صبحه‌دین بالام صبح ایدوب نجه
تیز گیدون اونی آختارون تاپون سرعت ایلیـون قویمیـون گیجه
چوخ یوبانسا قورخوم بودور ویره چوللّر ایچـره جان گیتمه ساربان
گــر آلام اَلـه قانلـو زلفومی کـلّ عالمــی زایـل ایلــرم
اشگیله بو صحرانی ایسلادوب کـاروانـی پـا بَـر گِـل ایلرم
کاروانــی لنـگ ایلیـوب سیزه گیتمــاق امـرینی مشـکل ایلرم
بیر قدم قدمـدن گوتـورمسون ناقـه ساربــان گیتمـه ساربــان
گرچـه بـو بالا قید عشقله تــار زلــف اکبرده بسته‌دور
لیک قالمیوب مَشیَه طاقتی یول گلوبدی یورقوندی خسته‌دور
ناله‌سی گلور هی قولاقیمه صبریمی آلـور دلشکسته‌‌دور
گه بابا بابـا سسلنـور گهی عمّه عمّه جان گیتمه ساربان
بو یتیمه قیـزلار آرا بونون ناله‌سینده وار اوزگه اختصاص
نالیـه گلنـده سبب اودور حالینه یانار جمله عام و خاصّ
رنـج و زحـمت تازیانـه‌دن ایستیوب اونـی ایلسون خلاص
ناقه‌دن ییخوب ساربان یئره وار بیلـه گمـان گیتمـه ساربان
داغلانـوب دل داغداریمیـز اودلانــان زمـان خیمگـاهیمیز
یوخـدی گیتماقا اختیاریمز گیتمسـه اگــر شــاهِ راهمیـز
قالمیوب داخی غمگسارمیز نیــزه‌ده او باشــدور پنـاهیمیز
تا دوروب او باش بیزده بوچولی ایلــروخ مکـان گیتمه ساربان
مـن فـدا او باشـون وفـاسینه گور وفا یولون گوزلر آشکار
بیر سپاهی لنگ ایلیوب دوروب اؤز بالاسینــی گوزلــر آشـکار
بنزمــور عبــث نـوک نیزه‌ده منتظــر گــوزه گوزلــر آشکار
گورمیـوب بیلـه مهربـان آتا دیــدۀ جهــان گیتمــه ساربان
شاعر: شأنی
خطاب جناب زینب به‌سر امام
نیزده قارداش باشون ایلور تجلّا زینبه
گوسترور هر جلوه‌سیندن مین تسلّا زینبه
پرتـو انــور حقـدن نـوک نیزه طوریدی
طورده موسانی حیرتده قویان بو نوریدی
لفظ «اَرنی»دن کلیمه نور حق منظوریدی
«لَن» تَـرانی سویلین اولموش هویدا زینبه
نیـزه‌ده باشـون گورن ای مظهـر حیّ وَدود
سویلوری عیسادی بو داره چکوب قوم یهود
شعلـۀ آهیلـه وورسا مشعل خورشیده دود
وار یری دُوردومجی گؤیدن باخسا عیسا زینبه
ای هـلالی زینبــون وی صـورتی بَدر تمام
ایله‌موشدون بو گیجه یوخسا کول اوستونده مقام
تازه آی تک گوسترولّر بیر بیرینه خاصّ و عام
باشـووه خلـق ایلـور ایما باشون ایما زینبه
تئـز گلیـدون پیشـوازه سـن گرک قالـدون گیجه
قالموشـام حیرتـده من بولمم گونـوزدور یا گیجه
گون ندور اولسا گیجه گوندوزدور آی چیخموش نیجه
اولساگر گوندوز ایدوب غم لیل یَلدا زینبه
ای هدایـت اهلینـه مصبـاح ذات ذوالمِنَن
نـه دیوم نـه چکموشم شام غریبانوندا من
روشن ایتموشدون گیجه خلوتگه اغیاری سن
بیر قرانلوق خیمه اولموشدی مصلّا زینبه
ای جمـال اللّهـه مَظهـر وجهی وجه باقیه
میندیروب عشقون منی قول باغلو عریان ناقیه
عشق اولا بـو بادۀ عشقی ایچوردن ساقیه
ایله مست ایلوب گلور غملر گوارا زینبه
ایمدی تبلیغات ایدوردوم خلقه اصل مذهبی
تاسسون گلدی گلوگیر ایتدی غصّه زینبی
سن دانیش زینب دلون قربانی آندور مطلبی
خارجی آد قویماسون بو قوم اعدا زینبه
ایله محـو ایتـدون منی بیر جلوۀ دیدارده
اوزلوقومدان خارج ایتدون مجمع اغیارده
باشون آردینجـا دولانّـام کوچه و بازارده
عالم عشقونده خوشدور هر بلایا زینبه
هاشمیّانـه آچوبـلار ظلم اَلین اهل جفا
گه دوگولّر قیزلارون گاهی دیولّر ناسزا
بیر نفر یوخ دادرس ناچار ایدولّر اِلتجا
گـه رقیّـه گـه سکینـه گـاه لیـلا زینبه
فکریمه ایتمزدی هیچ بو ماجرا قارداش خُطور
سن اؤلرسن زینبین باغلار قولون قوم شَرور
ایلـر اهـل کوفـهدن بـو پایه‌ده کینه ظهور
کف چالالار طعن ایدلّر دُخت‌زهرا زینبه
زینبون دیندیرمسن دیندیرمه قوی پژمرده حال
اوز قیزوندور فاطمه باری دانیشدیر گوگلون آل
آز قالور قلبین اریتسون غصّه ایتسون ارتحال
بو صغیره دردی اولسون درد عُظمی زینبه
ایتمورم یالقـوز مـنِ بیخانمان نی‌‌تک نوا
هاردا بیر اوغلی اؤلَن وار دلشکسته بینوا
ییِغمیشام اطرافیمه منلن اولوبلار همصدا
آغلیاندا سس ویرور بیر دسته ثَکلا زینبه
ایلین گونلـر آتـام حیدر خلافت کوفه‌ده
خدمتیم اولموشدی اهل شهره عادت کوفه‌ده
ایمدی ایلولّر منه قارداش شماتت کوفه‌ده
تنگ اولوبدور چشم سوزن‌تک بو دنیا زینبه
ظاهـراً گــر چـه اسیرم دستگیرم بیقرار
باطناً امّا خوشام چون وار رضای کردگار
صورت مکشوفه‌لـرده معنـی تـوحیدوار
بو اسـارت گوستـرور صورتده معنا زینبه
ای حسینی چوخ مقدّسدور بو زینب ساحَتی
غصّه‌دن مین ایل گیچوب عمرونده هر بیر ساعتی
هر کیمون اولسا بیوک دردی چتین بیر حاجتی
صـدق اوزیله یا حسینه آغلاسون یا زینبه
شاعر:حسینی
احوالات کوچ از شام
ای شامیان اولدوز کیمی باتدی رقیّم
یورموشدولار ویرانه ده یاتدی رقیّم
پروانه تک شمعندن اوتری چوخ دولاندی
شاماتیـده مقصودینـه چاتــدی رقیـّم
تک قویمیون قبرین بو بیر یالقیز اوشاقدی
یوخدور یانیندا بیر کسی ائلدن اوزاقدی
آخـر سیـزه نازلـی بالام بوردا قوناقدی
باشدان وطن فکرین داخی آتدی رقیم
ظلمیلـه اولــدی دستگیـر قــوم عنـاده
قـول باغلـی گیتـدی مجلس ابـن زیاده
گلدی قانادسیز قوش کیمی یولاردا داده
آی تـک دولانـدی شامده باتدی رقیم
مـرگ رقیّـه اود سالـوب ویران سرایه
یوخدور آتاسی قارداشی گلسون عزایه
گئتسم غمین شرح ایلرم صاحب لوایه
بولسـون وصـالی فرقتـه ساتدی رقیم
نـار ملالـی عالمـی یاندوردی یاخدی
قارداش فراقنده یوزه گوزیاشی آخدی
گوندوز گجه اکبر دئدی یولاره باخدی
خون دلین گوز یاشینـه قاتـدی رقیم
اشگیلـه درسیـن عارضه اَزبر یازاردی
بارماقیلـه توپــراقلارا اکبـر یـازاردی
گاهی سیلوب اکبر آدین اصغر یازاردی
مدهوش اولوب مقصودینه چاتدی رقیم
گاهـی گلـردی نالیـه گــه وای دیردی
گاهی گوروب قمچی یرین ایوای دیردی
گاهــی علـی‌اصغــره لای‌لای دیردی
صبـح و مسـا گرد غمـه باتدی رقیم
درد و مصیبت عالمـی سالدی گؤزیندن
راضیدی جان ویرسون خبر آلدیم اؤزیندن
قبـره قویانـدا آغـلادیم اؤپدیم یوزیندن
یورموشـدولار ویرانـه‌ده یاتدی رقیم
شاعر: اعظمی
زبانحال حضرت زینب به باد صبا
صبا حسینه ویر خبر قیزون رقیّه جانویرور
سنون کفن سیز اُولماقون خرابه‌ده نشان‌ویرور
قیزون رقیّه جانویرور
بابا بابـا دیــور یانـور ایـدور نظر صاقا صولا
یقین یولون گوزتلوری تیکوبدی چوخ گوزون یولا
بـو قـدر قویمـا گوزلـری یولونـدا انتظار اولا
نَوید وصلون اولساگر حیات جاودان ویرور
پوزوبدی حالی حالیمی گرک اؤلونجه دل یانا
اگر چـه نار غصّه‌دن یاخوندی قلبیم اودلانا
تمـام غصّـه بیریانـا ولـی بـو غصّـه بیریانا
قوری یئر اوسته بیله جان بو طفل ناتوان ویرور
حرملـرون باخـور یانـور آنـاسی اشگبار اولور
جنازه اوسته باش آچوب باجیسی ساچلارین یولور
قولونـدا قمچی یرلرین گورنده گوزلریم دولور
حُنوطی خاک غسلینی بو چشم خونفشان ویرور
نه وار سسیمه سس ویرن نه بیر نفر گلوب گیدن
گـوره بـالام غـریب اؤلور تدارک ایلیه کفن
ایدوم نه چاره نـه کمک نه وار هرایمه گلن
نه دیز گلور نه دل دوتور نه گوز یاشیم امان ویرور
حسین یارالی قلبیمون گل ایمدی یاره‌سین بِتور
قیزیـوی قبره قویماقا اؤزون بو منزله یئتور
منی سویوبلا باری سن اَلونده بیر کفن گتور
امیدی یوخدی بیرکسه باجون سنه گمان ویرور
وطن دگل بـو شهر شام اولا قبیلمـه قریب
جنازه‌سین گوتـورماقا گلـه قبیلـه و حبیب
بو اهل شهره نابَلَد اسیر شمر اوزوم غریب
غریبون اهل شهر اولان سسینه سس هاچان ویرور
نه فرش و نـه چراغ وار خرابه یئردی منزلی
نه سو و نه طعام وار نه سوز دیه دوتور دلی
باجون چتیندی حلّ ایده اؤلونجه بیله نسگلی
حجـاز عزیزی شامـده بـو ذلّتیله جـان ویرور
باخـان بولـر ملالیمی گوزومده قانلو یاشمه
باشیم اوجالیقی تؤکوب نه کول زمانه باشمه
نولوبدی بس منیم ائلیم نه گلدی آل هاشمه
صباح و شام دردسر بیزه بو شامیان ویرور
سُموم جور و ظلمیله خزان الوبدی گللرون
خـزان گُلینـه بنـزوری بو طفل ناز پَرورون
آجیندان عارضی سولوب سارالدی بو گل تَرون
بهـار عمر زینبـه بو غصّه‌لـر خزان ویرور
سـزادی بـو یتیمه‌نون فغانی کَوْنی دولدورا
اَجَلسیز اؤلدی اؤلدوروب بونی عدو وورا وورا
اولـوب ایاقـی آبلـه ایاقـه ایستـوری دورا
دورانـدا یاره یرلری ایاقلاریندا قان ویرور
حسینی بخت کوکبون دوشوب تزلزله سنون
ایدور محّب سرزنش بو حاله طَعنه دشمنون
نهـان مَلالـدن عیـان چیخار سپهره شیونون
حسینه آغلاسان خدا مرامووی اینان ویرور
شاعر:حسینی
نوحه اربعین
دور ای اولان سینه‌سی اوخلارا نشان یارالی
گلوبـدی شامه گیدن خسته کاروان یارالی
باجـون گلوبـدی سفردن دور ایله استقبال
اوقان دولان گوزون آچ زینبم اویان یارالی
سنون فراقیوه دؤزمک حسین قوجاتدی منی
بلای هجـرون ایدوب قدیمی کمان یارالی
گیدنده کوفیه جسمون کفن سیزیدی سنون
بو ماجـرا باجـوین قلبین ایتدی قان یارالی
کفـن تاپولـدی و یـا قبریـده کفن‌سیزسن
آپـاردی کؤینگیـوی شامـه کوفیـان یارالی
یـارالی سینوین اوسته آلـوبسان اصغریوی
بوغـازی یاره الون اوسته ویردی جان یارالی
باشیـوی شمر ستمگر بدندن آیری سالوب
ستملـه اللریــوی کسـدی سـاربان یارالی
بو رسمدور که قوناق گلسه‌گر اوزاق یولدان
چیخـار قبـاقینه البتـه میزبــان یــارالی
سوسوز بوغازیوه قربان نیه سسون گلمور
دانیش منیلـه تاپوم طاقت و توان یارالی
کسیلموش اللریـوی چک یتیم‌لر باشینا
باجـون فـدا سنه ای یار مهربـان یارالی
حسین گوزوندن ایراق گللرون سولوب سارالوب
سولار گل اولماسا گلشنده باغبان یارالی
گلوبـدی لیلـی علــی‌اکبریـن زیــارتینه
دیور اوغول آناوام بس هایانداسان یارالی
کمک سیـزم چاغور عباس نامداری گله
اولا بـو چولـده مـن زاره پاسبـان یارالی
اوقدری دیل یاراسی شامین اهلی ووردی منه
شماتت اوخـلارینا اولموشام نشان یارالی
تحمـل ایلمــوشم هــر مصیبته قارداش
ووراندا قمچـی منه شمریله سنان یارالی
دیـار کوفـه‌ده بیـر خطبــه ایلدیـم ایـراد
جداده قانلی باشووی گورن زمان یارالی
شل اولسون اللری بیر داش جداده ووردی سنه
آلوب قراریمی داش یاره‌سین ووران یارالی
باشیمـی محمله ووردیم دیدیم سنه قربان
بو داغدیده باجون ای عزیز جان یارالی
باخـوردی کوفه‌لـی‌لر سـن گلنـده بازاره
دؤنیدی کـاش بیله گـردش زمان یارالی
جدا باشیندا باخیـردون یتیم اوشاقلاریوا
ووراندا اهـل ستـم طعنـۀ زبــان یارالی
بو آلتی گوشه‌‌لی قبرون فداسی آی قارداش
گلوبـدی زینب دلخستـه میهمـان یارالی
رقیـه گلمـدی ویرانســراده دفن اولدی
بابا دیه‌دیه ویردی او طفـل جـان یارالی
«مغانلو» شـام و سحـر ایلیر بو غمده نوا
اولوبدی یوسف زهرایه نوحه‌خوان یارالی
شاعر:مغانلو
در وفات حضرت زین‌العابدین
قدسیان یاسه باتوب عالمِ معناده بوگون
آغلوری لوح و قلم سیّد سجّاده بوگون
عالم معناده بوگون
نه بنی نوع بشـردور که باتوب ماتمه تک
غملنـوب انجـم وخورشید سما ماه فلک
نوحه‌خوان روح‌الأمین ناله ایدر جمله ملک
دوشنوب فرش عزا عرش معلّاده بوگون
دولدوروب عالم امکانی بوگون شور و نوا
بیـر مؤثّر غمیله درده گلوب ارض و سما
اوصیا و رُسُل آغلار باش آچوب شیرخدا
قالمیوب تاب و توان آدم و حوّاده بوگون
چوخ مصیبت چکوب عالمده بو مولای علیل
مَنجنیق ستمون اولدی دچاری چو خلیل
عُمروجـه سالدیـلا غـم آتشینه قوم رذیل
شیعه یانماقلیقا اولسون گرک آماده بوگون
کربلا واقعه‌سیندن صورا هر صبح و مسا
آغلادی جدّی حسینه واریدی قـدرتی تا
ایمدیـده سو گـوره شایـد که دیه وا اَبَتا
تؤکه گوزیاشی یوزه عالم بالاده بوگون
بولمـورم هانسی غمین ایلیوم ای شیعه بیان
قولی باغلی نئجه عرض ایلوم اولوب شامه روان
یاده دوشدوقجا او احوالی گوگوللر اولی قان
اود سالور قلبیمه گلدوقجه غمی یاده بوگون
شامـده گـور نقدر چکـدی مصیبت بو امام
کسلوب طاقت و آرامی اولوب صبری تمام
دوغمییـدی بویـوروبدور منـی ایکاش آنام
گورمییدیلـه منـی بستـۀ قلّاده بــوگون
وارد شـام اولانــدا او امـام اوغلـی امام
اود تؤکوبلـر باشینـا فرقـۀ بی‌ننگ و لُئام
دؤزدی هر بیر ستمی گوردی روا قوم ظُلام
آغلادان شیعه‌نی اول‌قصّه‌دی دنیاده بوگون
بزم شربـه گیدوب آخرده اولوب دردی مزید
ساخیلوب قوللاری باغلی ایاق اوستونده یزید
خیــزران ووردی آتـا باشینـه اول‌شــوم عَنید
یئتدی غم واقعاً اول سیّد سجّاده بوگون
غـم سجّـاد‌‌ده قـان آغـلاسا عالم یری‌وار
گوزدن آخسا یوزه اشگون یرینه دَم یری‌وار
بـو مصیبت گر ایده عالمی برهم یری‌وار
ماسـوا یاسه باتـا بو غم عُظماده بوگون
شاعر:شهاب
اربعین حسینی
ای خیمه‌سین تاراج ائدن عدوان حسینیم
ای قان ایچینده جان وئرن عطشان حسینیم
گتدیم سفردن عترت طاهانی قارداش
دور پیشواز ائت زینب نالانی قارداش
نازیلـه راحـت یاتمیسان ای قلبـی پاره
بیـرکس نجـه راحت یاتـار قلبینده یاره
دور بیر حسین خوش‌گلدون ائت بو دلفکاره
قلبیم سینیقدور ای شه خوبان حسینیم
سندن صورا چوخ اینجیدیم من دلشکسته
گلـدی یـارالی گوگلومـه غملر غم اوسته
باشـون دالیجـا هـر یئـری نـالان و خسته
گزدیم دولاندیم خوار و سرگردان حسینیم
بو آلتی گوشه قبروین باش داشی یوخدی
بنزیـر گـوزه‌ل انگشتره بیر قاشی یوخدی
یعنی باخان بیلسون بو نعشین باشی یوخدی
ای نعشی باشسیز دفن اولان عریان حسینیم
خـورد اولسا انگشر حسینیم قـاشی نیلر
پامـال اولان پیکــر عزیزیـم باشـی نیلر
جسمی کی باشسیز دفن اولا باش داشی نیلر
باغریم بو نسگلدن اولوب آلقان حسینیم
گلـدی سفـردن قیـزلارون ای شهریاریم
باخ بیر بو سولمش گللره ای گل عذاریم
قویمــا قـالا آغـلار بـو چشم اشکباریم
قـارداشسیزام بیچــاریم نـالان حسینیم
عطرین بو باشسیز پیکرین قبرونده آللام
عهد ائتمیشم بو ساچلاری قبرونده یوللام
بیر قانلـی کوینک قبریوه حسرتله ساللام
ایوای حسین وای سسلرم هر آن حسینیم
بیر گوهر الدن وئرمیشم من بو سفرده
قلبیم او محنتـدن گلـوب باللهی درده
نازلی رقیـم جـان وئـروب ویرانه‌لرده
اولدی بالام بیر گل کیمی خندان حسینیم
گور بو جفایـه کیـم دوزر ای شاه بطحا
کوللـر توکـردی باشیمه شام ایچره اعدا
نی ده گوروب اکبر باشین آغلاردی لیلا
قمچی ویـراردی باشینه عدوان حسینیم
عــزم ایلینــده مجلـس ابــن‌زیاده
گوردوم یـارالی باشوی نوک جداده
بنزردی بیر دوتقون آیا باشون هواده
امـا اوخـوردی نیــزده قـرآن حسینیم
بیر آز کئچوب گوردوم کسیلدی صوت قرآن
ناگـه باخانـدا نیـزه‌دن گوردوم آخور قان
ویرمیشدی بیـرداش آننیـوا بیـرنامسلمان
محملده یاردیم باشیمی گریان حسینیم
راضـی گلـر دائـم بو غمده شور شینه
ایستـه صفالــی قبریــوه بیــر اربعینه
بـو هیأتیله دسته‌جمع وورسـونلا سینه
اؤپسون ضریحون ایلسون افغان حسینیم
شاعر: راضی
توسّل به امام زمان
ای صبا باغریمیز دوندی قانه
گئت سلام ایله صاحب زمانه
عرض قیل ای بولوتدا گزن ماه
شیعـه‌نین قلبینـه سنـسن آگـاه
ذوالفقارون چک ای قدرت الله
منتظرلــر داخــی گلـدی جـانه
هارداسـان ای سـراج هدایت
چـولقادی عالمی ابـر ظلمت
نه شـریعت قـالوب نه دیانت
گل صفـا ویـر اؤزون بوجهــانه
داده گــل ای شهنشــاه دوران
توزباسوب قالدی مسجدده قرآن
قالمیـوب چـون جماعتده ایمان
حقــی ناحــق ائدوللــر عیـانه
غیبتون شیعه‌نون صبرین آلدی
خلـق ایچیندن حقیقت آزالدی
کربلانیـن یـولی باغلـی قالدی
جدیــوه زایــر اولمــور روانـه
هارداسان تئزگل ای شاه عادل
بـر مـلا ائتدیلـر حقــی باطل
اولدیــلار هیـکل دینـه قاتـل
آغـــلا احـــوال اســـلامیانه
ای مـــه آسمــان امـــامت
گورسنور چون ظهوروندن آیت
گل ائداخ گل جمالون زیارت
تیکمییـاخ گـوز داخـی آسمانه
بیز نقدری ویراخ قاره پرچم
تازه‌لنسیــن نقـدری محـرم
قان اولیدی اوگون نهر علقم
جـدوی قویدـی چـوخ یانه‌یانه
موج ائدوب آخدی داغ داش سواولدی
لیـک زهــرا گلستانـی سـولدی
اصغـرین آغـزی قانیلـه دولـدی
قنداقـی او ننوگـی باتـدی قانه
شاه دین الده آخمیش ستاره
باخدی حیران یمین و یساره
سسلـدی قـارداشین انتصاره
گـل ابوالفضـل امانـدور امانه
ایلــدون جنتــی نـوره بـاران
منده قالدیم بو صحراده حیران
گل آپـاردی علی‌اصغری قـان
آل الیمــدن بونــی ای یگانه
دور ابوالفضـل گـل بــزم رازه
تنگ اولوب عرصه شاه حجازه
گـور المیـده قالـوب بو جنازه
قویما چوخ طعن زخم و زبانه
اصغرین سوسوزین باشـدان آتدی
قان بوغازین دوتوب صوتی باتدی
اوخلانـوب اللـریم اوستــه یاتدی
غیــر ممکنــدی بیـرده اویانه
وئردی بو گل الینـدن صفاسین
من نجــه ساکت ایلوم آناسین
باری گل باغلا بو اوخ یاراسین
وئــر تسلــی دل باغبـــانه
قانینـی سپـدیم عـرش بـرینه
آغـلادی حالیمـه اهـل کینـه
وار یئری باشین آچسا سکینه
گلسـه بلبـل تـک آه و فغانه
بو حبیبوز بیر عاصی جواندی
قـدی بـار گنـه‌دن کمــاندی
درگهـوزده ولی نوحه‌خواندی
ای آقا لطف ائدون بو جوانه
شاعر:خسرو شاهی